Delhi law minister hlui bail dilna hnawlsak a ni

Delhi court chuan Delhi law minister hlui, BSc leh LLB degree lem siama puh a nih avanga man, Jitender Singh Tomar-a'n interim bail a dilna chu a hnawlsak.

Delhi-a rorellai, Aam Aadmi Party (AAP) sorkara law minister Tomar hi Thawhlehni khan man niin man a nih hnu hian minister a nihna aṭangin a bang a ni.Court chuan ni li chhung police custody-a awm turin a ti a ni. Tomar hian police custody-a awm tura tihna pawh hi a khing let a, mahse Saket court chuan hei pawh hi a hnawlsak a ni.

Nilaini khan police-te chuan Tomar-a'n BSc degree a neihna nia a sawi, Faizabad-a Awadh University-ah chhui chiang turin minister hlui hi an hruai a, hei bakah hian LLB degree a neihna, Munger, Bihar-a Bishwanath Singh Institute of Legal Study College-ah pawh hruai an tum bawk.

RML Awadh University chuan an university record-ah Tomar hi a lang lo tih Nilaini khan a sawi a, a BSc degree chu siamchawp nia sawiin, a chhuina kawngah pawh theihtawpa thawhpui zel an tum thu an sawi.

University media in-charge SN Shukla chuan, "Tomar-a marksheet leh degree document-te chu Pradeep Kumar chuan RTI hmangin enfiah a lo phut tawh a ni. Hei hi January 22 khan university chuan chhangin, record-ah hetiang engmah a lan loh thu a sawi a, kan thusawiah hian kan la ding nghet reng a ni," a ti.

Delhi police commissioner Bassi chuan thla khat dawn an chhuichian hnuah, Tomar hian Bar Council of Delhi-a in register-na atan BSc leh Law marksheet lem a thehluh bakah, migration certificate pawh a siamchawp niin a sawi.

AAP minister hlui, Tomar-a degree lem siama puh a nih vanga man a nih hnuin, BJP chuan AAP MLA Surender Singh-a'n election affidavit-a Sikkim University aṭanga graduate anga a insawi chu thu dik lo niin a puh leh.

RTI hmanga Mukesh Sharma-a zawhna, univeristy-in a chhanna chungchang sawichhuakin, BJP hruaitu Karan Singh Tanwar chuan Sikkim University leh a hnuaia college inziaklutah kum 2014-15 leh hma lama academic year-a BA course-ah zirlai Shri Surender Singh, s/o Shri Sher Singh R/O Village Chhara, District Jhajjar, Haryana tih hming hmuh tur a awm lo a ni, a ti.