Rampawn aṭanga ei tur lakluhte enfiah dawn Nestle-in FSSAI thupek ennawn tura ngenna a thlen

Nestle India siam, Maggi noodles chu mihring hriselna atana him tawk lo nia sawi a nih hnuin, food safety regulator, Food Safety and Standards Authority of India (FSSAI) chuan rampawn lam aṭanga ei tur lakluh-te pawh enfiah vek turin a ti leh.

Hetihlai hian Nestle India chuan FSSAI-in an thil siam, Maggi instant noodles mihring tan a him tawk lo nia thupek a tihchhuah chu ennawn turin Bombay High Court-ah a thlen. Mahse hetichung hian Maggi an pekchhuah tawhte chu an lakir chhunzawm zel tho tih a sawi. Nestle thu thlen hi vawiinah High Court chuan a ngaihtuah ang.

FSSAI-in ei tur lakluh enfiah tura a tihte hi gourmet cheese, cocoa butter, olive oil, oats leh sauces, chocolates leh crispies-te an ni. Heng ei tur sample-te hi test a, an labeling-a ingredients an tarlan ang chu a ni em tih finfiah turin a ti.

Uttar Pradesh-a food inspector pakhat ramdang aṭanga ei tur lakluh hrang hrangte sample te chu test tura an lakhawm thu leh, FSSAI hnenah report thehluh thuai a nih tur thu a sawi.

FSSAI chuan ei tur lakluhte test hi tihdan phung pangngai a nih thu sawiin, mahse hlawhtling taka kalpui tur chuan state regulator-te nen thawhhona ṭha an neih a ngaih thu a tarlang.

Official chuan-te chuan ei turte hi a pack-a an ziahlan leh a ei tur tak inmil lo a awm fo tih sawiin, label-a an tihlan chhan chu a leitute'n ei tur an siama an telhte en a, an duhzawng an thlan theina tura tih a nih laia thu dik tawk lo tarlan a ni ṭhin chu a ṭhat loh thu an sawi.