Delhi sorkarin halpuah a khap thu Supreme Court-ah hriattir

Delhi sorkar chuan Ningani khan halpuah leh halmawi hrang hrang zawrh leh hal chu Delhi khawpuiah kum tluana khap a nih thu Supreme Court a hriattir.

Supreme Court-a judge pahnih, justice Abhay S Oka leh justice Augustine George Masih awmna bench hnenah Delhi sorkar chuan hei hi hriattirin,"December 19, 2024-a sorkar thupek chuan halpuah leh halmawi lam chi reng reng a khap pumhlum vek a ni," a ti.

Bench chuan Delhi sorkarin khapna a siam hi ṭha a tih thu a sawi a, hemi rual hian National Capital Region (NCR) in a huam chin state zawng zawngin hetiang khapna hi an siam vek chauhin awmzia a nei thei dawn tih a sawi. Uttar Pradesh leh Haryana pawh Delhi sorkarin khapna a siam ang hi hmang ve turin a ti a ni.

Hrayna sorkar hian khapna siam ve tho mah se, green cracker erawh a huam tel lo thung. Air pollution in a tih buai tel, Rajasthan chuan an state chhung, NCR huama awm chinah halpuah khapna hi a siam ve bawk. Uttar Pradesh pawhin halpuah leh halmawi lam chi khap vek a tum tih a sawi bawk a ni.

Court hian environmentalist, MC Mehta petition thehluh, Delhi leh NCR-a air pollution nasa lutuk chungchanga kaihhruaina leh thupek siam tura ngenna a siam a ngaihtuah chungchang a ngaihtuah a. December 12 khan court chuan Delhi sorkar leh NCR state - Haryana, Uttar Pradesh leh Rajasthan sorkarte chu kum tluana halpuah leh halmawi khapna siam tur chungchangah thutlukna siam turin a lo ti tawh bawk.

Court-in hriattirna a pek a chhannaah hian Delhi sorkar chuan, Delh khawpuia halpuah/halmawi chi hrang hrang chu kum tluanin siam chhuah, dah khawl, hralh leh hal khap a nih thu hi a hriattir a ni.