Noida CEO-in office dawrtu putar ngaihthah vangin staff-te a hrem

Noida Authority CEO, IAS officer Dr. Lokesh M chuan an office dawr tura kal, putar pakhat chu thawktuten ngaihsak lo a, darkar eng emaw zat chhung dinga an innghah tir tih CCTV aṭanga a hmuh hnuah office-a hnathawk mi 16 te chu a hrem. Office-a thawkte hi minute 20 chhung ding chungin an hna ṭheuh a thawh tir.

Office dawr tura kal, putar hi property transaction chungchang buaipui tura kal niin tarlan a ni. Thawktute hian lo ngaihsak loin hun rei tak an nghah tir a ni. Lokesh hian thawktute chu kum upa te ngai pawimawh tura zilh pahin a hrem zui ta niin tarlan a ni.

Dr. Lokesh hi 2005 batch IAS officer niin 2023 khan Noida Authority-ah hian a thawk ṭan a, office hna thawh uluk taka vil a nih theih nan hian office chhungah CCTV 65 dah niin, putar an ngaihsak lo tih pawh hi CCTV kal tlanga a hmuh a ni bawk. A hnuaia thawkte zilh pah hian sorkar hna thawk chuan vantlang tana thawk tih a inhriat a, an dawrtute lo puih chu an tih tur a nih thu hrilhin a zilh zui bawk.

He thil thleng hi social media lamah pawh a darh zui hle a, mipui lam pawhin IAS officer chet dan hi fakin, khauh taka hnathawk te chunga a hmalakna chuan fak a hlawh zui hle. Hetianga hma lak ṭhin hian sorkar hnathawk inthlahdah leh an tih tur hre lo awm tam takte a tih ziaawm an rinthu an sawi zui nasa hle.