Slum area cheiṭhatna tur Adani Group hnena project pek HC in sut

Bombay High Court chuan nimin, Zirtawpni khan Adani Properties Private Ltd hnena Maharashtra sorkarin Mumbai-a mi retheite awmna hmun, Dharavi slum cheiṭhat leh thawm ṭhat hna thawhna tur, Dharavi Slum Rehabilitation Project a pek chhuah tawh chu a tih tawp sak.

High Court Chief Justice DK Uoadhyaya leh Justice Amit Borkar te ṭhutna bench chuan UAE-a awm, Seclink Technology Corporation-in Adani Properties Private Ltd hnena state sorkarin project a pek chungchanga petition a thehluh an ngaihtuah hnuah tender pek hi a tih tawp sak a ni.

Adani Group hian hectare 259-a zau, Dharavi thuamṭhatna tur tender hi kum 2022 khan Rs vbc 5,069 in an chhang a, he project hi pek an ni. Mahse Seclink Technology Coporation lam hian an chhang huai zawk nia sawiin, kum 2018 khan Rs vbc 7,200-a an chhan thu an sawi. State sorkar chuan tender hmasa zawk hi cancel-in, a tharin an ti chhuak leh a, Adani Group hnenah pek a ni ta tih sawiin, an thiltih dan hi duhsak bik nei leh, thil dik tawk lo niin an puh.