Covid-19 vangin mi 78,586 an thi tawh

India ramah Covid-19 hripui lengin ziaawm lam a pan thei lo a, thihpui pawh an pung zel. Mi sing riat dawn chu hri vang hian an thi tawh a, hri kai mek nuai 9 chuang an awm bawk.

Ministry of Health and family Welfare-in nimina report an tihchhuahah chuan Inrinni khan hri kai hmuh chhuah thar mi 94,372 an awm leh a, ramchhung hmun hrang hrangah hrikai mi 47,54,356 an awm tawh a ni. Enkawl dam an pung chak a, Inrinni khan mi 78,399 lai dama puan leh niin ni eng emaw zat chhung chu ni khata dama puan zat hi sing sarih chuang zel an ni. Nimina report tihchhuah thleng hian hri kai zinga 37,02,595 chu an dam leh tawh.

Darkar 24 chhungin mi 1,114 an thih belh leh tih tarlan a ni bawk a, dam an pun chak rual hian ni khata thi zat pawh hi ni eng emaw zat chu 1,000 an chuang tawh. Inrinni thleng khan mi 78,586 an thi tawh a; mi 9,73,175-in hri an la kai mek a ni. 

India ramah hian hri kai enkawl dam tawh rate hi 77.88% a ni tawh a, thihpui rate chu 1.65% a ni thung.

Indian Council of Medical Research (ICMR) chuan ni khatah sample 10,71,702 lai an endik leh tih nimina report an tihchhuahah an tarlang a, hri len ṭantirh aṭanga nimina report an tihchhuah thleng khan sample 5,62,60,928 an endik tawh. 

ICMR hian sample endikna tura laboratory pawmpui ram chhung hmun hrang hrangah 1,711 lai an nei tawh a, chung zinga 1,049 chu sorkar lab­oratory niin 662 chu private laboratory an ni thung. 

India ram State/UT zinga hri kai tamna ber Maharsahtra-ah chuan nimina sorkar report tihchhuah tharah hri kai hmuh chhuah thar 22,084 an awm leh a, hei nen hian mi 10,37,765-in hri an kai tawh a ni. Hri kai tam ber dawttu Andhra Pradesh-ah chuan mi 5,57,587-in hri an kai tawh a, AP leh Maha inthlauhna hi a tam hle.

AP-ah hian hri kai mek 95,733 an la awm laiin Maha-ah chuan mi 2,80,138 laiin hri an la kai. Maharashtra-ah hian thihpui an tam fal tawh hle bawk a, state dangah chuan sing thih tlinna an la awm loh laiin 29,115 laiin an thihpui tawh. 

Maharashtra tih loah chuan Tamil Nadu-ah Covid-19 vanga thi an tam ber a, mi 8,307-in an thihpui tawh a ni. 

1    Maharashtra    10,37,765    2,80,138    7,28,512    29,115

2    Andhra Pradesh    5,57,587    95,733    4,57,008    4,846

3    Tamil Nadu    4,97,066    47,110    4,41,649    8,307

4    Karnataka    4,49,551    97,834    3,44,556    7,161

5    Uttar Pradesh    3,05,831    67,955    2,33,527    4,34967