Health ministry-in Covid-19 kai dam tawhte inenkawl zui dan tur tichhuak

Union health ministry chuan nimin khan protocol thar, 'Post Covid-19 Management Protocol'  a tichhuak a, hei hi  Covid-19 kai enkawl dam tawhten hri an kai nawn loh nana an inenkawl zuina tura tih a ni.

 

Hri kai dam tawh te chu nitin Yogo practice ṭhin turin ministry chuan thurawn a pe a, hei bakah hian zing leh tlaia walk ṭhin tur te, tui lum in tam tur leh, nitin tui lum emaw bawnghnute lum emawa chyawanprash fiante khalh telh in ṭhin turin a ti bawk. 

Mimal te tana ministry-in zawm tura a tih zingah hian hmaituamna la hman chhunzawm te, physical distancing te leh kut silfai uluk te pawh a la tel a ni. Taksa natna dotu tihchak nan AYUSH medicine-te hmang turin ministry chuan thurawn a pe tel bawk a ni.

Hri kai dam tawh te chu Yogasana, Pranayama leh Meditation ti ṭhin turin health ministry chuan thurawn a pe bawk a, mut  tam, balance leh nutritious diet ngaih pawimawh a ṭul thu a tarlang. Meizial leh zu in lo turin hri kai dam tawh te chu ministry chuan a hriattir bawk.

Social media kaltlangin Covid-19 kai enkawl dam tawh te chuan hri an kai chungchang leh an dam dante midangte hrilh hria a, zirtirna pe turin a chah bawk a ni.