Rahul Gandhi-a'n hnathawktu nuarte a hmu
Congress vice president Rahul Gandhi chuan nimin khan New Delhi-ah nawrh huaihawt mek, East Municipal Corporation of Delhi (MCD) hnuaia sanitation worker-te a hmu.
New Delhi-a sanitation worker 12,000 vel chu hlawh an lak theih loh avangin ni 10 chhung an nuar tawh a, hei vang hian khawpui chhunga kawngsirah bawlhhlawh ton 15,000 vel a inchhekkhawm tawh a ni. Hnathawktute hian thla hnih hlawh an la tawh lo tih an sawi.
Sanitation worker-te hlawh lak theih loh chungchangah hian Municical Corporation thununtu, BJP leh Delhi sorkar an inpuh tawn a, hnathawktute hlawh tur fund pe chhuak ṭha loah an inpuh ve ve a ni.
Khawlum laia bawlhhlawh chhehkhawl tam tak awm hian mipui hriselna thlengin nghawng ṭha lo a siam thei a ni tiin, Congress party chuan hnathawktute harsatna tawh mek chu chinfel sak thuai turin a phut.
Delhi Chief Minister Arvind Kejirwal chuan sanitation worker-te harsatna an tawh chhanah BJP rorelna hnuaia awm mek, Munipical Corporation of Delhi (MCD), New Delhi Municipal Council (NDMC) leh Delhi Cantonment Board (DCB) te a puh a, hnathawktute hlawh tur chu a chin hriat lohin a bo a ni, a ti.
Nimin vek khan Delhi Lieutenant Governor Najeeb Jung chuan BJP hnuaia municipal body pathum-a mayor-te hmuin, nawrh huaihawt mekte hlawh tur cheng vaibelchhe 493 chu Delhi sorkarin a pek tur thu a sawi. LG chuan mayor-te hnenah hian nawrh huaihawt mek, hnathawktute chu nawrh titawp tura hma la turin a ngen bawk.