Pathianni-a Yoga Day hman tum Catholic-in duh lo

Catholic Bishops Conference of India chuan June 21, Pathiannia sorkar laipuiin Yoga Day hman a tum chu an duh loh thu sawiin, Pathianni chu Kristiante ni serh a nih thu an sawi.

CBCI President leh Syro-Malankara Major Archbishop Cardinal Baselios Cleemis chuan yoga hrim hrim hi an do lo tih a sawi a, hemi rual hian tun hnaia Kristiante tana ni pawimawh bik, Pathiannia thiltih eng emaw buatsaih a ni ta fo chu pawi a tih thu a sawi. Hemi chungchang hi an kohhran chuan thunei­tute hnenah thlen an tum thu a sawi bawk.

Kerala Catholic Bishops Council (KCBC) hruaitu ni bawk, Cleemis chuan, "Yoga hi kan dodal a ni lo. Mahse tun hnaiah Pathiannia thil buatsaih a ni fo hi a pawi kan ti hle a ni. Kristiante tan chuan Pathianni hi ni thianghlim a ni a, hetiang ni pawimawha program dang lo buatsaih hi kan rindan nen pawh a inmil lo a ni," a ti.

Hetihlai hian sorkar laipuiin school-a yoga class compulsory-a dah a tumna chu minority group hrang hrangin an dodal a ni.