Bihar CM hlui leh BJP an thawkdun dawn

Kumin kumtawp lama Bihar assembly inthlan neih turah, Bihar Chief Minister hlui Jitan Ram Manjhi kaihhruai Hindustani Awam Morcha party-te an thawkdun dawn.

Ningani khan Manjhi leh BJP Prsident Amit Shah chuan thawhdun dan chungchang ngaihtuahin meeting an nei a, inremna an siam thei ta a ni. Meeting zawha chanchin thar lakhawmtute a kawmnaah, Manjhi chuan BJP a thawhpui tur thu leh, party seat insem dan chungchang chu June 15-a core-party meeting neih hnuah an la sawiho tur thu a sawi. Assembly seat awm zawng zawng, seat 243-ah BJP nen chuan an thawkdun vek dawn niin a sawi.

Manjhi chuan RJD hruaitu Lalu Prasad Yadav leh JD(U) hotu leh Chief Minister, Nitish Kumar-te'n thawhdun an tum dan chu a thianghlim lo hle a ni, a ti. A tum ber chu inthlan­ah heng mi pahnihte hi thu­neihna an chan theih lohna tura paihthlak a ni, tiin an hneh ngei a rin thu a tarlang.

CM hlui, Manjhi chuan JD(U) aṭanga hnawhchhuah a nih hnua a party din thar, Hindustani Awam Morch chu NDA sorkarah pawh peng pawimawh tak a ni chho dawn tih a sawi a, Election Commission-ah party symbol tur a dil mek tih a sawi.

BJP nena an thawhdunna turah hian CM candidate tur chungchang an la sawi loh thu Manjhi chuan a sawi a, mahse CM candidate tur tihfel a, puanzar thuai chu a ṭhaa a rin thu a tarlang bawk.