Fake degree: AAP-in Tomar chhui chiang dawn, Smriti Irani laka action lak phut

BSc leh LLB degree lem siama puh a nih avang man, Delhi Law Minister hlui Jitendra Singh Tomar chu a awmna party, Aam Aadmi Party (AAP) chuan a hranin an chhuichiang ve leh dawn tih an sawi. Hemi rual hian AAP chuan degree lem siam chungchangah Union HRD Minster Smriti Irani leh BJP MP Ramashankar Kataria-te pawh chhui chiang turin sorkar laipui a phut nghal bawk.

Nimin khan AAP hian Delhi-ah press conference a buatsaih a, AAP senior leader Ajay Singh chuan Tomar-a degree chungchang chu mi tinin an ngaihven a, hei vang hian thu dik tak haichhuaha, hriattir an ngai a ni, a ti. Party Lokpal chuan Tomar chungchang hi a chhui chiang dawn a, Tomar-a'n degree a neihna nia a sawi edu­cational institution aṭang­in thil pawimawhte an la­khawm vek dawn tih a sawi.

AAP chuan degree lem chungchanga Tomar-a chungchang an buaipui ang bawkin, Irani leh Kataria-te chungah pawh action la turin a phut. Ajay Singh chuan Narendra Modi-a cabinet minister zingah 30% zet chu criminal charge nei lai an nih thu sawiin, heng mite hi ngaihven an ngai a ni, a ti. PM Modi chu ramdanga a zinchhuah reng avangin a minister, pawikhawihna lian tham tak tak thubuai neite chungchang ngaihtuah turin hun a nei lo a ni, a ti.

Congress party pawhin Tomar ang bawka certificate lem hmanga ngaih, Union Minister Irani leh MP Kataria-te chu chhui chiang ve ngei tura sorkar laipui a phut thu a sawi. Irani hi a educational qualification chungchangah information dik tawk lo pe-a puh a ni a, Kataria hi marksheet lem siama puh a ni bawk. Hemi rual hian Congress chuan Delhi Chief Minister Arvind Kejirwal-a chu a minister-in dik lo taka thil a tih avangin CM a nihna aṭanga bang turin a phut bawk.

Hetihlai hian Tomar-a'n BSc degree a neihna nia a sawi, Uttar Pradesh-a Faizabad college chuan Tomar hi an college-ah a zir lo niin a sawi. A degree neihte enfiah tur hian Ningani khan Delhi Police-te chuan Tomar hi Faizabad-ah hian an hruai a, Law Degree a neihna nia a sawi, Bihar-a Bishwanath Singh Institute of Legal Study College-ah nimin khan an hruai leh bawk. Delhi Police-te chuan Tomar-a'n Faizabad-a Dr Ram Manohar Lohia Avadh University-a BSc a zir nia a sawi lai, kum 1985-1988 hian Delhi University hnuaia Rajdhani College-ah BA regular student a ni tih an hmuchhuak tawh tiin an sawi.