AAP-in welfare scheme zawm duhte inah kal chilh dawn

Delhi-a rorellai, Aam Aadmi Party (AAP) sorkarin welfare scheme thar pahnih a siam, Mahila Samman Yojana leh Sanjeevani Yojana atana inziahlut duhte tan December 23 aṭangin hun a hawng dawn a, hemi atan hian in tinah an kal chilh dawn a ni.

AAP national convenor leh Delhi chief minister hlui, Arvind Kejriwal, Delhi chief minister Atishi, Deputy CM hlui Manish Sisodia te chuan nimin khan Delhi-ah press conference neiin, scheme thar an siam tur atana hamṭhatna awm thei hrang rangte an sawi. He scheme-a inziak luh duhte tan AAP worker-te chuan door-to-door registration drive an neih tur thu an sawi.

Mahila Samman Yojana hnuaiah Delhi khawpuia cheng nghet, hmeichhiate chuan thla tin Rs 2,100 an dawng thei dawn a ni. He hmalakna hi chhung enkawlna leh, zirna sang zawk an zirna kawnga hmeichhiate puihna atana tih a ni.

Kejriwal chuan scheme pawimawhna hi sawi langin, "Kan nute leh farnute thawh rim zia kanhria a ni. Tam tak chuan pawn lama hna thawk chungin in chhung a enkawl bawk. Rs 2,100 hian zirlai hmeichhiate chu an zirna kawngah a pui thei ang a, in chhung enkawltu nute pawh an mamawh leina tur atan a pui thei dawn a ni," a ti. He scheme siam a nih tur thu an puan hnuah hrechiang duha zawttu pawh tam tak an awm tih sawi. Scheme-a inziak lut duhte tan hun tam tak an sen ngai lo turin, AAP worker-te zawk chuan in tinah an kalh chilh zawk dawn a ni, a ti.

Sanjeevani Yojana hi kum 60 leh a chunglam tana a thlawna healthcare pekna tur a ni. He scheme hmanng hian kum 60 leh a chunglam te chu an sum lak luh eng zat pawh ni se, Delhi sorkar chuan sorkar leh private damdawi-ina an inenkawlna senso tumsak dawn a ni.