Kerala CM-in state 11 CM hnenah CAA duh lohnaa thurualpuia sawmna lehkha a thawn

Kerala chief minister Pinarayi Vijayan chuan state 11 chief minister-te hnenah Citizenship Amendment Act (CAA) 2019 duh lohnaa thurual pui tura sawmna lehkha a thawn.

Kar kal ta Thawhlehnia khan Kerala state assembly ṭhukhawm chuan CAA 2019 duh lohna resolution an pass a ni. Vijayan chuan BJP CM neih lohna state-ahte lehkha thawnin, an state-in resoution an pass ang hian state dangte pawhin pass se, lungrual taka CAA do hna thawk ho turin a sawm a ni.

CAA bakah hian National Register of Citizens (NRC) duh lohnaah pawh thurualpui turin state 11 CM-te hi a sawm nghal bawk. Vijayan hian Mamata Banerjee (West Bengal), Arvind Kejriwal (Delhi), Hemant Soren (Jharkhand), Uddhav Thackeray (Maharashtra), Nitish Kumar (Bihar), Y S Jaganmohan Reddy (Andhra Pradesh),Kamal Nath (Madhya Pradesh), Amarinder Singh (Punjab), Ashok Gehlot (Rajasthan) Naveen Patnaik (Odisha) leh V Narayanasamy (Puducherry)-te hnenah lehkha hi a thawn a ni.