Himachal Pradesh, J&K, vur nasa takin a khuh a, meikhuin Delhi-NCR a tuam

India hmarchhak hmun eng emaw zat chu khaw vawt nasa takin a nuai a, Himachal Pradesh, Jammu and Kashmir, leh Uttarakhand-ah vur a tla nasa hle a, hei vang hian zin kawng a buai phah hle. Himachal Pradesh-ah hian national highway pathum telin kawng 226 lai khar a ni tawh a, Uttarakhand-a Dehradun-ah chuan Tyuni-Chakrata-Mussoorie National Highway kilometer 30-a thuiah vur tla nasa in a ti buai bawk.

Uttarakhand-a Dharanadhar-Koti Kanasar kawngpui chu vur hian nasa takin a khuh a, Delhi aṭanga khualzin pahnih chu an tangkhang niin news agency IANS chuan a tarlang. vur tla nasa tak hian Jammu and Kashmir pawh thlasik lai thil thleng mak ah a siam a, mahse tualchhung mite leh khualzinte tan hrehawmna tam tak a thlen phah a. India Meteorological Department (IMD) chhinchhiah danin, Srinagar-ah hian a lum ber lai chuan -7 degree Celsius a ni.

India Meteorological Department (IMD) chuan Himachal Pradesh-ah khaw vawt nasa tak a awm avangin 'orange' alert a tichhuak a, state chungah hian vur tam tak a awm a rinawm thu a sawi. Weather department sawi danin, state chhung hmun ṭhenkhatah pawh kar tawp chhungin ruah leh vur a tla thei bawk.

IMD chuan, "December 26 hian Himachal Pradesh leh Jammu and Kashmir-a hmun kilkhawr deuh hrang hrangah cold wave aṭanga severe cold wave a awm a rinawm hle a ni," a ti.

Himachal Pradesh-a kawngpui 226 khar zinga 123 chu Shimla-ah a ni a, 36 chu Lahaul leh Spiti-ah a ni a, 25 chu Kullu-ah a ni. Hei bakah hian transformer 173 a tibuai a, hei hian state pumah power supply a nghawng niin an tarlang.

Hetih mek lai hian Thawhlehni zing khan Delhi khawpui chu boruak dinhmun 'chhe lutuk' category-ah a awm reng avangin meikhu chhah tak chuan a tuam a ni. National capital-ah pawh mit a hmuhphak a tlahniam a, hei vang hian thlawhna kalpui dan pawh a buai hle. Indira Gandhi International Airport (IGI)-ah hian zing dar 12 aṭang khan thlawhna 83 lai chu chhuah tlai a ni.