Uttarakhand CM bang turin phut

Uttarakhand BJP chuan state Chief Minister Harish Rawat-a chu pawngsual tawktu hmeichhe pakhatin thubuai thehlut turin a nawr nia a sawi avangin CM a nihna aṭanga bang turin an phut.

BJP hruaitu Harak Singh-a'n a pawngsual nia FIR thehluttu hmeichhe pakhat chuan a thusawi thlak danglamin, CM Harish Rawat-a'n ti tura a nawr avangin FIR hi thehlut a nih thu a sawi. Hei vang hian dik lo taka mi phiarru a, hmeichhia a vau bawk avangin Harish Rawat-a hi CM office-a ṭhu zel tlakah an ngai lo niin state BJP President Ajay Bhatt chuan a sawi.

Assembly-a eptu hruaitu, Bhatt chuan hmeichhia hian FIR a thehluh ni aṭang khan an party chuan thil dik lo a awm nia an rinhlelh thu a sawi. Dik taka rorel an duh thu leh, thil dik lo titu dik tak chu dan hmang a chunga rorelsak an duh thu a sawi.

Safdarjung police station-a FIR thehluttu hmeichhe pakhat hian July 29 khan Harak Singh hian Green Park area-a a chenna inah a pawngsual niin a sawi a ni.