Pentagon-in Pakistan ṭanpuina sum pe dawn lo

US Defence Secretary Ashton Carter-a'n Congress-ah, Pakistan-in a rama firfiak pawl Haqqani chungah action a la ṭha tawk tih a pawmpui theih loh avangin Pentagon chuan Pakistan sipaite tana dollar maktaduai 300 pek tur a neih chu a pechhuak dawn lo tih a sawi.

US official-te chuan Pakistan sorkar hi a ram chhunga Islam firfiak pawl, Afghan Taliban leh Haqqani network chungah action la ṭha tawk loah an lo puh fo a, hei vang hian ram pahnihte inkar pawh a ṭhat loh phah a ni.

Pentagon thupuangtu Adam Stump chuan, "Secretary hian Pakistan sorkar hma lak dan a ṭha tawk tia a pawmpui theih loh avangin sum hi kan pechhuak thei lo a ni" a ti. Sum hi Coalition Support Fund (CSF) hnuaia pek tur a ni a, hei hi US Defence Department chuan Pakistan-in a rama firfiak pawlte laka beihpui a thlakna puihna atan leh, a sensote phuhrukna atana a program duan a ni.

Kum 2002 aṭang khan CSF hnuaiah hian Pentagon chuan Pakistan hnenah hian dollar tluklehdingawn 14 a pe chhuak tawh niin Pentagon chuan a tarlang.

Hetihlai hian Pakistan chuan firfiakte laka hma la ṭha tawk loa puhna chu hnawlin, Islam firfiak pawl hrang hrang an beih mek avangin tih theih loh chinte pawh a awm niin a sawi a, CSF chu Pakistan leh US-in tum thuhmun neia an thawhdunna pakhat a ni tih Washington-a Pakistan embassy thupuangtu Nadeem Hotiana chuan a sawi.