Ex-servicemen te'n OROP hman phutin nawrh huaihawt Petition-ah thisenin an hming an ziak

Sipai bang, ex-servicemen chuan nimin khan sorkar laipui chu One Rank One Pension (OROP) scheme hmang tura phutin New Delhi-a Jantar Mantar-ah nawrh an huaihawt. An thil phut chungchanga Prime Minister Narendra Modi leh President Pranab Mukherjee-a te hnena petition an thehluhah chuan thisenin an hming an ziah hnan a ni.

Ex-servicemen hian PM hnenah OROP hi a rang thei anga bera hman tura ngenna an lo thawn tawh a, sorkar laipui chuan he scheme hi a thlawp thu a sawi laiin a hman hun tur lo bituk lawk erawh a duh lo a ni.

General (retired) Raj Kadhyan chuan, "Nawrh huaihawt kher hi kan duh lo a, mahse kawng dang thlan tur kan nei tawh lo a ni. Kum 6 chhung chu OROP hman phutin sorkar kan nawr tawh a, kan dikna chanvo kan dil mai a ni. PM chu a hman ṭan hun ruat turin kan phut a ni," a ti.

Indian Ex-Servicemen Movement (IESM) a media advisor, Col (retd.) Anil Kaul chuan, "Prime Minister Narendra Modi chuan he scheme hi hman nghal a ni ang tiin min tiam tawh a, mahse a mi tiam aṭangin kum khat a liam leh tawh a ni," a ti.

One Rank One Pension scheme hi ramchhunga ex-servicemen maktaduai 3 dawn awmte'n hun rei tak an lo phut tawh a ni. He scheme hmang hian defence personnel, service-a an thawh chin leh rank in angte chu, pension-a an chhuah kum en loin pension in ang tlang veka pek tura tih an ni. He scheme hi a taka kalpui a nih hunah chuan ex-servicemen nuai 22 leh an nupuite thihsan tawh nuai ruk chuangte'n an chhawr thei nghal ang.

Kum 1973-a Third Pay Commission hman a nih aṭangin pension chungchanga harsatna hi a awm ṭan a, kum 1996-a Indian Army-a Major leh Indian Navy leh Air Force-a an rank pui pension-te chuan kum 2006-a Major pension-te aiin 53% in an la tlem zawk a ni.

Sorkar laipuiin OROP scheme kalpuina tura hma a sawn theih loh avanga lungawi loin, kum nga liamta khan veteran eng emaw zat chuan an medal dawn 20,000 chu sorkar hnenah hian an lo pe let tawh a ni.

Jantar Mantar-a ex-servicemen nawrh huaihawt hi loneitu pawl eng emaw zat chuan a thlawpna lantirin an zawm.