Lalit-a visa dilpui vangin Swaraj-i bang turin phut

Congress party chuan External Affairs Minister Sushma Swaraj-i chu sorkar laipuiin a hrek mek, Indian Premier League (IPL) chairman hlui, Lalit Modi-a'n United Kingdom a kal theihna turin visa a dilpui avangin minister a nihna aṭanga bang turin a phut.

Congress hruaitu Shakeel Ahmed chuan, "Foreign Minister-in dan bawhchhetu a pui tlat hi thil pawi tak a ni. Lalit Modi hi BJP hruaitu eng emaw zat nen an inpawh ṭha hle a, an zingah hian Rajasthan Chief Minister pawh a tel. External Affairs minister chuan thuneitute'n India ram chhuahsan an khapsak laiin a zinchhuah theihna turin a pui a, hetihlai hian Prime Minister Narandra Modi chu a lo ngawi reng bawk a ni," a ti.

Foreign Minister thiltih dan dik lo tak chungchangah PM chu inrawlh tura an phut thu leh, Sushma Swaraj-i chu banna thehluh tir tura an phut thu a sawi. He thil thleng hi chhui chian tir turin Prime Minister an phut a ni.

T20 cricket tournamet fund tichingpena puh, Lalit Modi-a'n UK a kal theihna turin Indian-origin British MP Keith Vaz chuan a dilpui a, UK immigration official-te hnena a dilpuinaah Swaraj-i hming hian a nawrpui tiin British media-te chuan an tarlang.

Hemi chungchang puanzar a nih hnuah Swaraj-i chuan a thiltih chhan hi sawifiahin, "Kum 2014 July thla khan Lalit Modi hian min rawn bia a, a nupui chu a cancer thu leh, August 4-ah Portugal-ah zai a nih tur thu min rawn hrilh a ni. Hemi hunah paper-a hming sign turin hospital-ah a awm ve a ngaih thute a sawi a, London-a zin phalna a dil a, mahse UPA sorkar chuan hei hi a lo dansak tih min hrilh bawk. Ka khawngaih avangin British High Commissioner hnenah British rules and regulations hmanga Lalit Modi-a dilna chu ennawn tur leh, travel document an pe a nih pawhin India leh UK inlaichinna engmah a nghawng loh tur thu ka hrilh a ni," a ti.