Sorkarin refugee 4,300-te citizenship a pe

Sorkar laipui chuan kum khat ro a rel chhungin Pakistan leh Afghanistan aṭanga Hindu leh Sikh raltlan rawn lut, mi 4,300 chuang chu India khua leh tui, citizenship a pe hman.

UPA sorkar khan a sorkar term hnihna, kum nga chhung khan citizenship hi mi 1,023 hnenah a lo pe tawh bawk.

Home Minister Rajnath Singh chuan BJP policy chu tihduhdah tawktu Hindu-te tan India ram chu an innghahna leh an chawlhna ina siam a ni tiin, India rama himna zawnga rawn raltlante chu lawm taka lo dawnsawn an ni ang, a ti.

Nikum Lok Sabha inthlanpu neih dawna a campaign-naah khan Prime Minister Narendra Modi chuan Pakistan leh Bangladesh aṭanga Hindu refugee rawn lutte chu India mi anga lo enkawl an ni ang, tiin a lo sawi tawh bawk.

India ramah hian Pakistan, Bangladesh leh Afghanistan aṭanga Hindu leh Sikh raltlan mi nuai hnih vel an awm mek.

PM Modi-a kaihhruai NDA a sorkar hnu khan raltlan rawn lut zingah mi 19,00 chu Madhya Pradesh-ah long-term visa pek an ni tawh a, Rajasthan-ah mi 11,00 leh Gujarat-ah mi 4,000-te long-term visa pek an ni tawh bawk, tiin official-te chuan an sawi.