Supreme Court-in AIPMT 2015 a hnawl Exam buatsaih Ṭha turin a hriattir
Supreme Court chuan All India Pre Medical Test (AIPMT) 2015 neih zawh tak chu a hnawl a, Central Board of Secondary Education (CBSE) hnenah kar li chhung ngeia exam buatsaih ṭha leh turin a ti.
May 3-a AIPMT exam result hi June 5-a tihchhuah tura tih kha a ni a, exam-ah hian exam beitu zirlai 700 velin an mobile phone aṭangin answer key an dawng nia sawi a nih avangin result pawh hi tihchhuak lo tura tih a ni bawk. Exam result chhuah hun tihkhawtlai a nih avang hian MBBS nih tuma exam beitu, mi nuai 6.3 vel dinhmun chu tun thlengin tihchian theih a la ni lo.
Exam ni hian state 10-a examination centre hrang hrangah question paper leh answer key putru chu electronic device hmangin thehdarh a ni. He thil thleng vang hian Supreme Court-ah petition thehluh a ni a, nimin khan Justice RK Agrawal leh Amitava Roy awmna bench chuan thuchhuah siamin, kar li chhunga exam buatsaih ṭha leh turin a ti ta a ni.
Hetihlai hian CBSE chuan exam buatsaih ṭhat leh hi thil awlsam a ni lo a, hun rei tak inbuatsaih a ngaih thu a sawi. CBSE aiawhtu, Solicitor General Ranjit Kumar chuan May 3-a exam buatsaih tur khan nikum October thla aṭanga inbuatsaih ṭan a nih thu a sawi.
General Ranjit Kumar chuan question paper put neitu nia an chhuichhuah chu zirlai 44 an ni tih sawiin, heng mite avang hian exam centre 1,050-a exam beitu, zirlai maktaduai 6.3 vel hmakhua lo tihkhawtlai sak tur a ni lo, a ti.
Mahse Justice Roy chuan CBSE hnenah hian hetiang thil dik lo a awm tih hi hun eng emaw chen a hriat hnuah pawh veng turin hma a la lo tih a hrilh. Justice Roy chuan, "Kum 2012 aṭang khan a veng tur hian hma in la tawh tur a ni. Hma in la a nih pawhin in thiltih chu a hlawhchham vek tihna a ni. Paper putruk chungchangah CBSE chu thiamloh kan chantir lo a, mahse CBSE chuan information technology hmanga thil hrang hrang thleng thei awmte chu lo do let turin hma a la tur a ni," a ti.