Swaraj-i bang turin nawr chhunzawm zel

Sum tichingpena puh, IPL hotu hlui Lalit Modi-a tana travel document dilpuitu, External Affairs Minister Sushma Swaraj-i chu bang tura nawrtu an pung zel.

Congress party chuan Swaraj-i hi a thiltih avang hian minister a nihna aṭanga ban ngei tura Prime Minister Narendra Modi an phut thu an sawi tawh. Nimin khan nawr chhunzawm lehin, Minister Swaraj-in cheng vaibelchhe 700 tihchingpenna inhnamhnawih leh chhiah awlruk bakah thubuai dang nei, Lalit Modi-a a puih chungchanga PM Modi a ngawi tlat chu an dem thu an sawi bawk.

Swaraj-i chuan Lalit Modi-a nupui, cancer natna vei chu Portugal-ah zai a nih dawn avangin Lalit Modi-a hian a hming a sign a ngai a, hei vang hian British Commissioner hnenah a sawipui tih a sawi. Mahse hei hi chhang letin, Congress party hruaitu PL Punia chuan Portugal ram danah a nupui zai a nih dawn avangin a pasal-in a hming a sign kher tur tih a ni lo tiin a sawi.

Senior advocate Prashant Bhushan chuan Swaraj-i hi bang turin a nawr ve leh a, a thiltih dan hi chhui chiang turin thuneitute a phut bawk.

Bhushan chuan, "Lalit Modi-a ukil-a Sushma Swaraj fanu a ṭan laiin British sorkar hnenah visa chungchang hi Swaraj chuan a lo sawipui a ni," a ti. Hei hi thil tihawm lo tak nia a ngaih thu sawiin, a fanu-in Lalit Modi-a hnen aṭanga a chhawrna man fee a dawn lai renga Lalit-a tana a lo dilsak chu thil tih loh tawp tur a ni, a ti.

Aam Aadmi Party (AAP) pawhin Swaraj-i hi a thiltih chungchangah in­sawi­fiah turin an phut bawk. AAP hruaitu Kumar Vishwas chuan, "Mi­nister hi bang turin kan phut lo a, mahse a thiltih dan hi a sawifiah ngei kan phut thung a ni," a ti a, a thiltih dan chu Prime Minister Office rawn loa a tih hmasak an rin loh thu sawiin, "Hei hi a dik lo a nih chuan a insawifiah ngei tur a ni," tiin a sawi.

Bang tura nawrtu an pun zel avangin Delhi Police-te pawhin nimin khan venthawn thilah Sushma Swaraj-i chenna ina venhimna chu an tikhauh a ni.