OROP: Sipai bangte'n chaw ngheia nawrh an huaihawt

Sipai bangte'n One Rank One Pension (OROP) scheme kalpui tura sorkar laipui an phut hnuah, an thil phut nawrna atan hian nimin aṭang khan New Delhi-a Jantar Mantar-ah chaw ngheia nawrh an huaihawt ṭan.

Sorkar laipuiin OROP scheme hun rei tak a tihkhawtlai sak avangin Pathianni khan ex-servicemen te hi Delhi-ah lungawi lohna lantirin an pungkhawm tawh bawk.

OROP phuta nawrh huaihawt hi Indian ex-servicemen Movement (IESM) hnuaiah neih a ni a, IESM hian an thil phut hi tihhlawhtlin a nih loh chuan chaw ngheia sorkar nawr an tum thu kar kalta khan a lo sawi tawh a ni.

Pathiannia Jaipur-a hun a hmanah Defence Minister Manohar Parrikar chuan ex-servicemen-te thil phut chu an hriatthiam pui thu leh, thu an lo tiam tawhte chu tihpuitlin ngei an tum thu a sawi a, hemi rual hian dawhthei taka lo nghak turin a ngen nghal bawk.

Prime Minister Narendra Modi chuan thla tina radio-a hun a hman ṭhin, 'Maan Ki Baat' program-ah a kaihhruai sorkar chuan OROP chungchang chu a tifel thuai dawn tiin a lo tiam tawh bawk a ni.