India ramah WhatsApp kaltlanga inbumna a tam

Ministry of Home Affairs (MHA) in report a tih chhuahah, India rama cyber-criminal ten midangte bumna atana an hman zingah WhatsApp chu an hman nasat ber niin a tarlang.

MHA report chuan WhatsApp, Instagram leh Telegram kaltlanga inbumna a thleng nasa hle. Annual Report 2023-24 chuan kum 2024 first quarter-a cybercriminal complaint lut 43,797 zingah WhatsaApp kaltlanga inbumna thleng hi 22,680 a awm niin a tarlang. Telegram hmanga inbumna thleng hi 19,800 complaint a awm bawk. Cyber-criminal te hian Google service, a bikin Google Ads chuan an mi bitumte bumna atan an hmang ṭangkai hle nia sawi a ni bawk a ni. Midang bumna atana an hman lar tak chu ‘Pig Butchering Scam’ or ‘Investment Scam’ tih a ni.

Home Ministry cybersecurity wing, Indian Cyber Crime Coordination Centre (I4C) chuan cybercrime hluar zel veng tur hian theihtawp a chhuah a, Google leh Facebook pawh information in hriattirna kawngah a thawhpui a ni.

Sorkar laipui pawhin WhatsApp account hi sing tel a block tawh bawk. Heng account a block tam ber hi international number nena inthlunzawmin, Indian user-te an bitum ṭhin.

Sorkar laipui chuan online hmanga bumna tawktute tan complaint thehluhna tur National Cybercrime Reporting Portal a siam a, he portal hi hman awlsam tak niin user-te chuan bum an tawk a nih chuan a evidence nen upload in, an case an buaipui chhoh dan pawh an thlithlai zel thei dawn a ni. He portal hmang hian user-te chu online hmanga inbumna awm ṭhin laka an him dan tur hrilh hriat an ni bawk.