Eptute'n Swaraj-i hum tumah PM an puh

Dan bawhchhiaa puha thubuai nei mek, Lalit Modi-a zin chhuah theihna tura a puih vanga eptute'n bang tura an nawr mek, External Affairs Minister Sushma Swaraj-i chungchangah Prime Minister Naren­dra Modi chu a la ṭawng­chhuak duh lo. Hei vang hian eptute chuan dik lo taka thiltitu, Swaraj-i hum tumah PM hi an puh.

Congress vice pre­si­dent, Rahul Gandhi chuan, "Swaraj-i hi PM Modi hian a ṭan tlat a ni. Sorkar laipui hi Modi-a mi­mal thuneihna hnuaiah a awm a ni, midang aw in awmzia a nei lo. Minister hi cabinet member aṭang­in a bang tur a ni," a ti. Congress thupuangtu Randeep Surjewala pawhin, "Swaraj-in Lalit Modi a puihnaah PM Modi-a pawmpuina a hmu a ni tih finfiah a nih chuan, PM hian a zahawmna a hloh ngei ang," tiin a sawi bawk.

Hetihlai hian Enforce­ment Directorate (ED) chuan T20 cricket tourna­ment neihnaa sum tam tak tichingpena Lalit Modi puh a nih chungchangah thubuai 16 siamsaknaah Modi hi hriattirna a pe leh dawn. Thla hnih liamtaah khan ED hian Prevention of Money Laun­dering Act hnuaiah Delhi leh Gurgaon-a hmun ṭhenkhat a lo dap tawh a, hetah hian Lalit Modi-a account kaltlanga rampawn lama cheng vaibelchhe 125 thawnchhuah nia hriat pawh an hmuchhuak a ni.

Lalit Modi-a hnena travel document pek a nih laiin foreign secretary, Sujatha Singh chuan hemi chungchang hi a hriat ve loh thu leh, Union Minister Sushma Swaraj-in engmah a rawn loh thu a sawi. Hetiang thil pawimawhah chuan minister hian foreign secretary hi a rawn ngei tura ngaih a ni. Sujata Singh hi a term a zawh hma thla nga-ah NDA sorkar chuan bang turin a lo ngen tawh a ni.

IPL tournament sum tichingpena puh a nih avanga ED in Lalit Modi a chhui hnuah, Modi hian India chhuahsanin London a pan nghal a ni. Kum 2010 khan External Affairs Ministry chuan Lalit Modi-a passport hi a hnawlsak a, Directorate of Revenue Intelligence (DRI) pawhin Interpol kaltlangin a lakah hian blue corner notice a tichhuak bawk. Blue cor­ner notice hi sum tichingpena puh, thu­neitute'n an awmna chin hriat an duhte laka tih­chhuah ṭhin a ni. DRI chuan Lalit Modi-a laka hriattirna a tihchhuah hi a la sut lo a, a la nung reng tih a sawi.