Home Minister-in Delhi CM a hmu
Union Home Minister Rajnath Singh chuan Delhi Chief Minister Arvind Kejriwal-a hnenah Delhi Lieutenant Governor Najeeb Jung nena an inkara inhriatthiam lohna awmte chingfel turin a hrilh.
Thawhṭanni zinga Delhi CM Kejriwal leh Deputy Chief Minsiter Manish Sisodia-te nena meeting an neihnaah he thu hi Home Minister chuan a sawi.
Delhi sorkar chu admistrative chungchanga LG nena buaina an neihah President hnuklut loa chinfel dan kawng zawng turin Singh chuan a chah.
Home Minister chuan Delhi-ah chuan National Capital Territory (NCT) Act hman a nih thu leh, hei hi state sorkar pawhin a hriat a ṭul thu a sawi.
Hetihlai hian Kerjiwal-a kaihhruai, AAP sorkarin Delhi-a power hman man 6% a tihsan avangin nimin khan BJP worker-te'n lungawi lohna an lantir. Delhi sorkar laka an lungawi loh thu sawiin BJP member-te chuan kawng an zawh a, kawngzawhte hnawhdarh tumin police-te chuan water cannon an hmang a ni.
BJP Delhi unit hotu, Satish Upadhyay chuan AAP sorkarin mipuite laka a thutiam a hlen lo tih sawiin, sorkar chu hlawhchhama an ngaih thu a sawi. Upadhyay chuan, "Arvind Kejriwal khan Delhi Chief Minister a nih chuan power hman man cheng khat pawhin tihsan a ni lo ang tiin a lo sawi tawh a ni. Mahse tunah power hman man hi 6% a tihsan a nih bakah, electric supply pawh kan hmu ṭha lo hle. He thila mawhphurtu chu electricity company-a 49% share neitu, Delhi sorkar hi a ni," a ti.
Delhi Electricity Regulatory Commission (DERC) chuan kar hmasa khan power hman man tihsanna tur hi a pawm a, hei hi June 15 aṭanga hman ṭan tura tih a ni.