Modi-a thusawi vangin Pak zualko a tum

Prime Minister Narendra Modi-a'n Bangladesh a tlawh ṭuma a thusawi danah Pakistan chu lungawi loin, United Nations-ah zualko a tum a, parliament-ah resolution an pass.

PM Modi-a lakah zualko an tum thu hi Pakistan Prime Minister's Advisor on Foreign Affairs Sartaj Aziz-a'n a sawi.

Bangladesh a tlawh tum khan PM Modi hian, "Liberation war laia, Bangladesh-a 'Mukti Jodhas' te'n thisen an chhuah lai khan, India mite chuan Bangladesh tan theitawp an chhuahpui a, Bangladesh duhthusamte tihpuitlin a nih theihna turin an pui a ni," tiin a sawi. Pakistan chu Modi hian bei zuiin, Pakistan-in firfiaka chetna a thlawp avangin India ram tan harsatna nasa tak a siamsak a ni, tia a sawi thu Aziz chuan a tarlang bawk.

Dhaka University-a thu a sawiah, Modi chuan, "Pakistan chuan India a tibuai a, firfiaka chetna a thlawp avangin pawikhawihna pawh a thleng fo a ni," a ti.

Aziz chuan Modi thusawi chungchang hi UN-ah thlen an tum thu sawiin, "Pakistan chuan kum 1971-a East Pakistan ṭhendarh a nih theihna tura India inrawlh dante pholang turin a ṭul angin hma a la dawn a ni," tiin a sawi. Bangladesh-a Modi-a thusawi dan chu inhuatna chawk tho thei a ni tiin, Aziz chuan hetianga thu a sawi hi thil pawi tak a ni, a ti.