Gujarat-ah Dalit-ten ni 10 awh tur kawngzawh huaihawt

Gujarat-a Dalit hnamte chuan ni 10 awh tur, Ahmedabad aṭanga Una thleng kawngzawh an tum chu an ṭan ta.

Dalit hnamte hian Gujarat state-ah an hnam chu enhran leh beih an nih fo avangin duh lohna lantir a, an hnam tana zalenna phuta kawngzawh 'Aazadi Koon' (March for Freedom) hi an huaihawt ta a ni. Ni 10 chhung kawng an zawh dawn a, hemi chhung hian km 350 vela thui an kal dawn a ni.

Kawngzawh hi August 15-ah Una khuaah a tawp dawn a, he hunah hian Dalit hnamte chuan zalenna phutin inkhawm an buatsaih ang. Kawngzawh huaihawttu zinga mi, Una Dalit Ataychar Ladal Samiti hotu Jignesh Mewani chuan an hnam enhran leh enhniam an ni chu an ngaizam mai mai tawh dawn lo tih hriattir an tum tih a sawi.

Mewani chuan, "Kawngzawh chhung hian mipuite hnenah Prime Minister Naraendra Modi-a'n a tihlar em em, Digital India and Skill India hmalakna hnuaiah hna dil tur tein kan hrilh dawn a ni. Hei bakah hian Una-a Independence Day kan hman tura lo tel turin kan sawm zel dawn bawk a ni. India ramin zalenna a hmuh hnuah, tun ang hian Dalit hnamte hian an thil phut lantirna hun an la buatsaih ngai lo" a ti.

July thla khan bawng humhalhtu intite chuan Gir Somnath district-a Una khuaa Dalit mi pali-te chu bawng thi tawh vun an lak avangin na taka sawisak an ni. He pawikhawihna thleng kaihhnawihah hian mi paruk man an ni tawh.

Dalit mite kutthlak an nih avang hian Gujarat state hmun hrang hrangah nawrh huaihawt a ni a, an lungawi lohna lantir nana mahni intihhlum tum eng emaw zat chhanchhuah an ni bawk. State sorkar laka an thil phut 10 zingah hian an eizawnna kawng dapsak tur te, reservation act hnuaiah Dalit chanpual siam sak te, Dalit chhungkaw tana ram pek te, Dalit mite hnuaichhiah venna tur dan khauh tak siam te, Forest Right Acts siamte a tel.

India rama Dalit hnam, mi maktaduai 200 chuang zinga 2.3% chu Gujarat-ah hian a cheng a, state mipui zat aṭangin 7% an tling a ni. Gujarat-a cheng Dalit zinga 80% chuang hi nitin inhlawhfa chawpa eizawng an ni a, a tam ber chu agricultural sector-a thawk an ni. Dalit hnam zinga a zahve vel hi ram nei lo emaw, ram acre khat aia zim nei emaw an ni.

Kanpur police kuta awm Dalit mi thi :

Uttar Pradesh-a Kanpur khuaah Dalit mi pakhat chu police kuta a awm laiin a thi a, hei vang hian police outpost-a duty mi 15-te chu suspend an ni a, constable panga chu thubuai siamsak an ni bawk.

Thawhlehni khan police-te chua kum 25 mi, Kamal Valmiki chu rukruk thilah thu zawhfiah turin an ko a, mahse Ningani khan lock-up ah thia hmuh a ni. Valmiki thih thu hi an hriat hnu hian mipui thinrim chu police post bulah pungkhawmin, police-te hi lungin an tawng a ni.

Valmiki chhungte chuan police-ten na tak an vuak hnuah a hliam tuar loin a thi niin an sawi. A ruang hi post mortem tura thawn a ni.