Kashmir-ah curfew an puan belh leh

Kashmir Valley tualchhung buaina thleng vangin ni 28 chhung nunphung a tikhaihlak tawh a, inlakhran duhtu pawlten kawngzawh huaihawt an tum vangin nimin khan hmun tam zawkah curfew puan belh leh a ni.

Police official chuan inlakhran duhtuten Srinagar-a Hazratbal shrine pana kawngzawh an tum avangin Srinagar district pumah curfew hi puanṭhat leh a ni a, hei bakah hian Ganderbal, Budgam, Anantnag town, Awantipora, Kulgam town, Baramulla district-ahte puan a ni bawk tih a sawi.

Hmun ṭhenkhatah curfew hi thlahdul ni mah se, Kashmir Valley pumah chuan buaina a chhuah venthawn thlah mi pali aia tam punkhawm khap a ni.

Hizbul Mujahideen commander Burhan Wani kahhlum a nih vanga mipui leh security force-te inkara buaina chhuak vang hian ni 28 chhung chu nunphung a tibuai tawh a, school, college, sumdawnna hmun, petrol pump, bank leh private office-te pawh khar an la ni. Sorkar office-te chu hawn ni mah se hnathawktu kal an ṭha lo thei hle.

Kashmir Valley-ah hian mobile internet service pawh tihtawp a la i a, prepaid connection-ah outgoing facility dan a la ni bawk. Inlakhran duhtu pawl chuan August 12 thleng lungawi lohna lantir chhunzawm an tum thu an sawi a, politician-te chuan an party-a an post chelh bansan turin an phut bawk.