Panel-in AAP MP thla lakna hmun an tlawh

Lok Sabha panel chuan Aam Aadmi Party (AAP) MP Bhagwant Mann-a'n parliament building chhung video hmanga a lak, social media lama a tihchhuah chu security lam thawmṭhat ngai a awm dawn em tih enfiahin an tlawhkual.

Panel member pali-te chuan an chairman Kirit Somaiya hoin security spot hrang hrangte an enkual a, Parliament security leh Delhi Police official-ten an ṭawiawm a, Parliament-a security duty-te chu an titi pui bawk.

Somaiya chuan," Mann-a'n a video-a a tihlante kan enkual a, security duty-te hnenah pawh engtin nge video-a an laktir theih tihte pawh kan zawt a ni" a ti. Committee chu kar lehah inhmukhawm lehin, Parliament security tihkhauh dan turte an sawiho dawn tih a sawi.

Committee chun report chi hnihin a thehlut dawn tih Somaiya chuan a sawi a, pakhat zawk chu Mann-a'n vantlang hmuha Parliament security a pho lan dan a ni ang a, report dangah chuan venhimna siamṭhatna tura rawtna an neihte tarlan a ni ang, a ti.

Panel hian August 4 khan Lok Sabha Speaker Sumitra Mahajan-i hnenah report thehlut tur hian kar hnih hun a dil belh a ni. Thil awmdan chhui fel a nih a, thutlukna siam a nih hma chuan AAP MP hi Lok Sabha rorel inkhawmah tel lo tura hriattir a ni bawk.

Member pakua awmna Parliamentary Panel-ah hian Somaiya bakah BJP MP pahnih - Meenakshi Lekhi leh Satyapal Singh, Anandrao Adsul (Shiv Sena), B Mahtab (BJD), Ratna De (TMC), Thota Narasimham (TDP), K C Venugopal (Congress) leh P Venugopal (AIADMK) te an awm a ni.