Gujarat CM atan Vijay Rupani la lut

Gujarat Chief Minister thar atan Bharatiya Janata Party (BJP) hruaitu Vijay Rupani chu nimin khan laklut a ni.

Gandhinagar-a Mahatma Mandir conference hall-ah Governor O.P. Kohli chuan Rupani-a hi rinawmna thu tiam tirin CM thar atan a la lut a, Deputy CM atan Nitin Patel leh minister atan mi 23-te lakluh an ni bawk. CM thar lakluh inkhawm hi BJP hruiatu LK Advani leh Arun Jaitley bakah, Goa, Madhya Pradesh leh Rajasthan chief minister-ten an hmanpui a ni.

Anandiben Patel-i'n a kum upat chhuanlama CM aṭanga banna a thehluh hnuah, BJP chuan amah thlaktu atan Rupani-a hi an thlang a ni. Kar kalta Inrinni khan Rupani-a hian Governor Kohli hmuin, sorkar thar siam tura thlawptu a ngah tawk thu hi a hrilh.

Patel-i hnuaia minister pakua-te chu sorkar tharah hian ban an ni a, hengte hi cabinet minister pathum leh junior minister paruk an ni. Minister thar lakluh zingah hian an hnam puala reservation siamsak phuta hun rei tak nawrh huaihawt tawh, Patidar hnam aṭangin mi pariat an tel thung. Minister lakluh thar zinga pariat chu cabinet-rank niin, midang 16 chu minister of state an ni. Vawiin hian cabinet meeting hmasa ber an nei nghal dawn a ni.

Prime Minister Narendra Modi leh BJP President Amit Shah-te chuan an twitter-ah Gujarat CM thar hi lawmpuina an hlan. PM Modi chuan state hmasawnna turin an thawk chhunzawm zel dawn tih a sawi a, hemi rua hian CM aṭanga bang ta Anadiben Patel-i'n Gujarat tana a lo thawh tawhnate chu a fak thu a sawi bawk.

Vijay Rupani

Kum 1956-ah Rangoon, Burma-ah a piang.

Kum 1960-ah Rajkot-ah an pem.

Dharmendrasinhji Arts College aṭangin BA a zo a, Suarahstra University aṭangin LLB a zo leh.

Rashtriya Swayamsevak Sangh (RSS) a zawm hnuah, 1971-ah Jan Singh a zawm leh.

Kum 1987-ah Rajkot Municipal Corporation (RMC) corporator atan thlan a ni a, 1988-1996 chhung RMC standing committee chairman a ni.

Kum 1996-97 ah Rajkot mayor atan thlan a ni.

Kum 2006-12 chhungin Rajya Sabha member a ni a, parliamenary committee hrang hrangah a tel.

Kum 2014 November thlaa Anandiben Patel-i kaihhruai sorkar tihlen a nihin minister atan lakluh a ni a, transport, water supply, labor and employment ministry a chang.

Kum 2016 February thla khan state BJP president atan thlan a ni.