Allahabad school-ah hnam hla sak phal lo

Uttar Pradesh-a Allahabad-a private school, MA Convent School thuneitute chuan an school compound chhungah India hnam hla sak an phal lo a, hei vang hian Principal leh zirtirtute pariat an bang.

School thuneitute chuan India hnam hla hi Islamic sakhaw kalh niin an sawi a, hei vang hian Independence Day lawmna buatsaih an tumah naupangte chu sa lo turin an ti a ni. Principal Ritu Shukla chuan he thilah hian a mawhphurtu berah school manager Zia-ul-Haq a puh a, Jana Gana Mana leh Vande Mataram-te chu an sa thei lo ang tih a hrilh niin a sawi.

Mahse manager chuan an school-ah national anthem hi an sa ngai lo tih a sawi. Hnam hla-ah hian ram chu sakhua leh Pathian chunga awm angin a dah a, hei hi Muslim sakhua nen an inmil lo a ni, a ti. Pathian chungah eng thil mah a awm lo a, hei vang hian an school-ah sak an phal ngai lo tih a sawi.