Modi-a'n bawng humhalhtute chet dan sawisel

Prime Minister Narendra Modi chuan bawng humhalhtu pawl, 'Gau Rakshaks' inti ten tun≠hnaia bawng humhalh chhuan≠lama mawi lo taka an chet dan chu a sawisel. PM hi bawng humhalhtuten pawikhawihna an thlen ṭhin chungchanga a ṭawngchhuah ṭum khatna a ni.

PM hian sorkar laipui hmalakna, MyGov champha vawi hnihna puala session-a zawhna a chhannaah hemi chungchang hi a sawichhuak a ni. Modi chuan, bawng betu leh humhalhtu intite chu thil hrang daih a ni tiin, mi ṭhenkhat chuan bawng humhalh chhuanlamin pawikhawihna an thlen ṭhin a ni, a ti. Khaw≠tlanga pawikhawihna thlentu tam tak chuan an tihsual thupna atan bawng humhalhtu pawl hi an hmang niin a sawi. "Bawng humhalh dik tak an nih chuan bawngte hi plastic ei vangten an thi fo a, heng lakah te hian an veng zawk tur a ni" a ti.

July 11 khan Gujarat-a Una khuaa bawng thi vun an lak avangin Dalit mi pali chu bawng humhalhtu intiten van≠tlang hmuhah na takin an sawisa a, an sawisak lai video hi internet-ah an dahchhuah bawk a ni. He thil thleng avang hian Gujarat-a Dalit hnam chuan state chhung hmun hrang hrangah nawrh an huaihawt a, ni 10 awh tur kawngzawh runpui an buatsaih mek bawk. Eptu party hruaitu hrang hrang pawhin kut tuartu Dalit mite hi an tlawh bawk.

Gujarat-a Dalit mite beih an nih vanga lungawi lohna lantir kawng khat atan nimin khan Mysuru-ah bawngsa kut buatsaih a ni. He kut hi Mysuru Dalit Welfare Trust huaihawt a ni a, mahse thuneitute chuan phalna pek an ni lo tih sawiin kut buatsaihtu zinga pahnih chu man an ni tawh.