Pakistan PM-in Kashmir-a hliam tuarte enkawlna pek tiam

Pakistan Prime Minister Nawaz Sharif-a chuan Kashmir Valley tualchhung buaina thleng meka Kashmir mi hliam tuartute chu damdawi lama enkawla pek a tiam a, ramdangte hnenah pawh hliam tuarte enkawlna tur pe tura India sorkar nawr turin a ngen bawk.

Kashmir chungchangah hian India leh Pakistan inkar boruak hi a la ṭha lo hle a, buaina tipunlun zawngin Pakistan PM hia rawn ṭawngchhuak leh a ni. Hemi hma hian Home Minister Rajnath Singh chuan Islamabad-a SAARC meeting-ah firfiakte martar ang maia cheibawl lo tura a duh thu a lo sawichhuak tawh a ni.

Pakistan Foreign Office thuchhuah chuan, Kashmir-a mipui leh security force-te intihbuainaa sipaite silai mu lem kahchhuahah mi tam takin hliam an tuar a, a bikin an mita kah fuhte chuan enkawlna ṭha an dawn a ngai a ni, a ti. Heng mite enkawlna tur hi a rang lama ngaihtuah sak turin Sharif chuan ram hrang hrangte a ngen.

Sharif-a chuan India sipaite chuan mipui pawisawilote enkawltu, hospital leh ambulance-te pawh an bei fo niin a sawi a, sipaite silai mu lem kahchhuah avanga mitdel phahte chu an chhungte thlengin an tawrh phah a ni, a ti. Heng mite hi Pakistan chuan a theih angin a pui zel dawn tih a sawi.

Hizbul Mujahideen commander Burhan Wani kahhlum a nih avanga Kashmir Valley tualchhung buaina chhuak vanga thi hi 56 an tling tawh a, mi 5,000 chuangin hliam an tuar bawk. Inlakhran duhtu pawl chuan nimin khan a ni 30-na atan lungawi lohna an lantir chhunzawm a, August 12 thleng nawrh huaihawt an tum.