Maharashtra Health Minister in hlauthawng lo turin ti

India ramah Human Metapneumovirus (HMPV) hri kai mi pathum hmuh a nih hnuah, Maharashtra Health Minister Prakash Abitkar chuan nimin Thawhlehni khan state mipuite chu Maharashtra Health Department leh sorkar laipuiin kaihhruaina an siamte zawm turin a ngen a, hlauthawng lo turin a chah.

Brihanmumbai Municipal Corporation(BMC) chuan Thawhṭanni khan Mumbai-ah Human Metapneumovirus (HMPV) hri kai an awm lo tih sawiin, mipuite chu fimkhur turin a ngen. "Seasonal disease a ni a, thlasik leh thlasik tir lamah a awm tlangpui a, RSV leh flu ang chi a ni. He hri hi kum 2001 khan Netherlands-ah hmuhchhuah a ni a, China-a Human Metapneumovirus hmuhchhuah report hi lo buai phah loh tur a ni," a ti.

Hemi rual hian mipuite chu an khuh emaw, an thawk hah emaw chuan an hmui leh hnar chu rawmawl emaw tissue paper emaw hmanga khuh turin a ngen. "Kut hi sahbawn leh tui emaw, sanitiser hmang emaw in sil fo ṭhin tur a ni. Khawsik, khuh leh thaw hah i neih chuan vantlang hmun aṭanga inthiarfihlim tur. Tui tam tak in a, eitur ṭha tak tak ei tur a ni a, in chhungah boruak luhna ṭha tawk a awm ngei ngei tur a ni a, hei hian hri kai a ti tlem thei." tiin mipuite chu taksa insi lo tur leh tissue paper leh rawmawl hmang nawn lo turin a ngen bawk.

Union health minister JP Nadda chuan ram chhunga health system leh surveillance network-te chuan uluk taka an vil reng thu sawiin, harsatna a awm a nih pawhin rang taka hma an lak nghal tur thu a sawi. Mipuite tan lungngaihna tur a awm lo tiin, "Hriselna lama mithiamte chuan HMPV hi virus thar a ni lo tih an tichiang tawh. Kum 2001 khan hmuhchhuah a ni a, khawvel pumah kum tam tak a lo darh tawh a ni" a ti.