US-in India nuclear entity khuahkhirhna ti tawp

U.S. sorkar chuan India nuclear entity-te chunga khuahkhirhna a siam chu a titawp dawn niin US national security advisor Jake Sullivan chuan Thawhlehni khan a sawi. Hei hi ram pahnihten energy lama inzawmna thuk zawk an siam leh, nuclear deal an lo siam tawh tih chak a tumna a ni.

Jake Sullivan hi ni hnih chamin India ramah a rawn zin a, Thawhlehni khan Delhi-a inkhawm buatsaihah hun rei tak chhunga India rama nuclear entity lar ber ber te leh US company te inkara civil nuclear lama thawhhona ṭha awm tawh lo chu siamṭhat tuma hma lak a nih thu a sawi a, thil ṭulte tihfel mek a ni, a ti.

US leh India hian nuclear lama thawhdunna tur, Indo-US nuclear deal chu kum 2008 khan an lo ziak a, he inremna hi hetih laia ram pahnih hruaitu, Manmomah Singh leh George W.Bush ten an ziak a ni. An inremna hnuaiah hian US chuan India hnena civil nuclear technology hralh a phalsak a ni. Mahse dan chungchanga harsatnate a awm avangin an thawhohna chungchangah harsatnate a awm chho a ni. Hei vang hian inkaihhruaina te thlak danglam a ni dawn a, mahse official-te chuan eng ang taka thlak danglam tur nge tih erawh an sawilang lo.

Kum 1998-a India-in nuclear ralthuam a enchhin hnuah United States chuan India entity 200 chuang lakah khapna a siam tawh a, mahse kum tam tak chhung chu ram pahnihte inzawmna a lo ṭhan chhoh zel avangin mi tam tak chu list aṭangin paih chhuah an ni tawh a, mahse an hming erawh puanzar a ni lo.

Tunah hian U.S. Department of Commerce list-ah hian India Department of Atomic Energy-a entity pali a tel a, India nuclear reactor leh nuclear power plant ṭhenkhat pawh a tel bawk. India-in nuclear compensation dan khauh tak a siam hnuah ramdang power plant siamtute nena inremna an siamte chu a tihchhiat phah a, hei vang hian kum 2020 aṭanga 2030 thlenga nuclear power 20,000 MW siam chhuah tura a tum chu tih danglam a ngai ta niin a tarlang.