Delhi Assembly inthlan hun tur puang

Election Commission of India chuan nimin khan Delhi assembly inthlan neih hun tur atan February 5 ruat a nih thu a puang. Vote tlate hi February 8-ah chhiarin result puan nghal a ni ang. Inthlan hi thawh khata zawhfel tur a ni.

Member 70 awmna, Delhi Assembly term hi February 23 hian a tawp dawn a, hemi hma ngeia inthlan hi buatsaih a ngai a ni. Seat 70 zinga seat 58 hi general constituency niin tu tan pawh chuh theih a ni a, a bak seat 12 erawh chu scheduled caste (SC) tan dah a ni thung.

Delhi-ah hian vote nei mi 1,55,24,858 awmin an zinga mi 83,49,645 chu mipa an ni a, hmeichhe voter 71,73,952 bakah third-gender voter 1,261 an awm bawk. Vote nei zingah hian first time voter nuai 2.08 an awm tel a ni.

Vote thlakna tur polling station hi 13,033 siam a ni dawn a, hmeichhe hlang enkawl bik, pink booth hi 70 siamin, rualbanlo, persons with disablities (PwD) enkawl booth 70 a awm bawk ang. Polling station tinahhian webcasting dah a ni dawn bawk a ni.