Space Secretary leh ISRO Chief thar atan V. Narayanan ruat a ni

Appointment Com­mittee of the Cabinet chuan Indian Space Research Organisation(ISRO) Chairman leh Space Secretary thar atan rocket scientist, Dr. V. Narayanan a ruat. January 14 aṭang hian ISRO chairman ni lai S. Somanath chu a thlak ang.

Kum 61 mi, Dr Narayanan hi ISRO chairman 11-na tur a ni a, a hna thar hi kum hnih chhung a chelh dawn a ni.

Rocket leh spacecraft propulsion expert Dr Narayanan hian kum 1984 khan ISRO hi zawmin LPSC director hna a chelh a, he hna a chelh hma hian kawng hrang hrangah a ṭul ang ang a thawk ṭhin bawk. A hna thawh chhung hian ISRO hmasawnna turin hna pawimawh tak tak a thawh bakah ISRO Geosynchronous GSLV Mk-II leh GSLV Mk-III kah chhuah naah pawh khan a lo thawh hlawk hle.

Tamil Nadu-a Kanyakumar district chhuak niin, Narayanan hi Tamil-medium school-ah a kal ṭhin. IIT, Kharagpur aṭangin Cryogenic Engineering-ah M Tech leh Aerospace Engineering-ah PhD a zo a, M Tech programme-a rank pakhatna a hauh avangin Silver Medal hlan a ni bawk.