Rajnikanth-a'n January thlaah party thar puang dawn

South India superstar, Rajnikanth chuan political party thar a din chu nakkum January thlaah a puang dawn tih a sawi. 

Kum 69 mi, Rajnikanth chuan a twitter-ah hemi chungchang hi tarlangin, a party din thar hmang hian nakkuma Tamil Nadu assembly inthlanah thil  mak leh ropui tak thlentir an tum tih a sawi. Sakhua leh hnam bil tihbik nei lo party a nih tur thu a sawi bawk. 

"Assembly inthlanah  kan chak ngei dawn a;, sakhua leh hnam tihbik awm lo politics thianghlim, langtlang leh eirukna laka fihlim kan pe dawn a ni. Thil engkim kan thlak danglam vek ang," tiin Rajnikanth chuan a sawi. A hnua chanchinthar lakhawmtute a kawmnaah, Tamil Nadu mipuite chu a nunna hial pawh hlan a inhuam thu a sawi. 

BJP thupuangtu Narayanan Thirupathi chuan Rajnikanth party thar din tur chu a lawmpui thu sawiin, a party thlawp turin a sawm nghal bawk.