Sushma Swaraj, Vasundhara Raje-te'n min ṭanpui : Lalit Modi

Indian Premier League (IPL) chairman hlui, sum tam tak tichingpena puha thubuai nei mek, Lalit Modi chuan TV-a inteview a neihnaah External Affairs Minister Sushma Swaraj-i leh Rajasthan Chief Minister Vasundhara Raje-te'n an puih thu a sawi.

Modi hian Montengero-a chawlh a hmannaa TV channel pakhatin a kawmnaah he thu hi a sawi.

Rajasthan CM Raje hian Britain ramah luh a tumnaah amah ṭanpui turin ziakin a dilpui tih a sawi a, hei bakah hian Minister Sushma Swaraj-te nen chuan hun rei tak chhungkhat anga an awm tawh thu leh, Raje-te nen pawh kum 30 dawn an lo inhriat ṭhat tawh thu a sawi bawk.

Modi chuan kum hnih liamtaa Portugal-a a nupui cancer zai a nih ṭum khan Raje hian a nupui hi a kalpui tih a sawi.

Lalit Modi hi sum tam tak tichingpena puh a ni bakah Foreign Exchange Management Act, 1999 (FEMA) palzuta puh a ni. Thubuai siamsak a nih hnu hian Britain-ah pem luh tumin a bei nghal a, kum 2010 August thla khan Raje hian pem luh tuma a dilnaa 'Witness Statement' a lo ziahsak a, hemi kum aṭang hian London-ah a khawsa zui a ni. Witness statement chungchang hi puanzar a nih hnuah, Raje chuan he document hi engmah a hriat ve loh thu a sawi thung.

Jaipur-a chanchin thar lakhawmtute a kawmnaah, Rajasthan CM chuan, "Modi-te chhungkua hi chu hun rei tak aṭangin ka hre tawh a ni. Mahse document an sawi chungchang erawh hi chu ka hre lo," a ti.

IPL hotu hlui chuan sorkar hmasa, UPA sorkar khan amah chu a dodal tlat tiin a sawi a, finance minister hlui leh Congress hruaitu P Chidambaram chuan India ramah hruai kir leh ngei tumin a bei, a ti. IPL buaina avanga Congress minister Shashi Tharoor-a'n minister a nihna a chan hnu khan, Congress party leh Chidambaram chu politics thila a chunga phuba lak tumah Modi chuan a puh.

Ram danga zinchhuak thei lo tura India sorkarin a passport a laksak pawh chu dan kalh a ni, tiin Modi chuan a sawi bawk. A duh chuan India khua leh tui a nihna chu titawpin, ramdangah khua leh tui nihna a dil thei reng a, mahse UPA sorkar chuan a passport laksak a nih dan chu a dik lo a nih tih lantir a duh avangin hei hi a ti ta lo tiin a sawi bawk.

Finance Minister hlui, P Chidambaram chuan Modi-a puhna hi chhangin, "Modi-a'n UPA sorkar leh Congress a puhna chhanna chu UPA sorkar laia UK Chancellor hnena lehkha thehluhah a lang vek ang, heng lehkhate hi tlangzarh nghal rawh se," tiin a cho let.

Pawikhawihna lian taka inhnamhnawiha puh, Lalit Modi-a'n Sushma Swaraj leh Vasunradha Raje-te'n an pui tih a sawi hnu hian, eptute chuan hruaitu pahnihte laka action la turin Prime Minister Narendra Modi an phut nawn leh. Congress hruaitu PL Punia chuan, "Thubuai rip tak nei Lalit Modi-a lo ṭanpui hi thil pawi tak a ni," a ti. Sachin Pilot pawhin, "Ram pawn lama sum chheprelh a, dan kalha thiltitu a lo ṭanpui avangin Rajasthan CM hian a insawifiah ngei a ngai a ni," tiin a sawi bawk.

Lalit Modi-a laka thubuai siamtu, Enforcement Directorate chuan Modi leh a thawhpuite chungchang hi a la chhui zui reng a, an thil chhuina aṭangin IPL hotu hlui hian Rajasthan CM Raje-i fapa, BJP MP Dushyant Singh-a firm hnenah cheng vaibelchhe 11.63 a pe tih hmuhchhuah a ni.

ED chuan Modi-a firm, Anand Heritage Hotels Pvt Ltd (AHHPL) chuan Mauritius-a Wilton Investment Ltd aṭangin cheng vaibelchhe 21 a dawng a, a sum dawn zinga vbch 11.63 chu Dushyant-a firm hnenah hian a pe leh a ni, a ti. He sum hi kum 2008, April thlaa a pek a ni a, loan leh share leina anga pek ni mah se, hei hi dan dika tih a ni em tih chhui chian a ni ang.