Mother Dairy Milk-ah insukna hlo hmuh a ni

Mother Dairy-in bawnghnute a siam chu enfiah a nih hnuin a him tawk lo nia ngaih a ni a, sample pahnih enfiah zinga pakhat zawkah chuan insukna hlo, detergent hmuh tel a ni tih food watchdog official chuan a sawi.

Food and Drug Administaration (FDA) department, Agra-a an hotu, Ram Naresh Yadav chuan Agra city aṭanga kilometre 70-a hla, Bah Tehsil-a Mother Dairy collection centre aṭanga sample pahnih an lak chu enfiah a nih thu a sawi. "Sample-te hi Lucknow laboratory-ah thawn niin, a pahnih hian a ṭha tawk lo nia puan a ni. Company lamin result hi an pawm loh avangin Kolkata lab-ah thawn leh a ni a, hetah pawh hian a him tawk lo tih hmuhchhuah a ni leh bawk. Kolkata lab-ah hian sample pakhatah insukna hlo hmuh tel a ni nghe nghe a ni," a ti.

Hetihlai hian Mother Dairy official Sandeep Ghosh chuan an puhna hi a dik lo niin a sawi a, an company thil siam chhuahte chu uluk taka test vek a ni, a ti.

Ghosh chuan, "Mother Dairy bawnghnute siamte hian test level pali an paltlang vek a ni. Tanker-te'n kan plant an rawn thlen pawhin quality test 23 neihpui ziah an ni ṭhin," a ti.