Rahul-a'n thingtlang tlawh turin PM a ngen

Congress vice president Rahul Gandhi chuan Prime Minister Narendra Modi chu ramchhunga thingtlang bial hrang hrangte tlawh a, MGNREGA-in mi rethei leh kut hnathawktute a puih dan te a taka hmu turin a ngen.

Congress hruaitu chuan PM Modi-a'n a suit manto kal san a, thingtlang hmun hrang hrangte tlawh a, mipuite'n harsatna an tawh dante a taka a hmuhpui a pawimawh thu a sawi.

"PM Modi chuan MGNREGA hi program ṭangkai lo tak niin a sawi a, mahse mi rethei zawk leh kut hnathawktute tana he program a ṭangkai dan chu hre turin a suit man to kalsan a, thingtlangah a zin a ngai a ni. Mahse hei chu a ti lo ang. US leh Australia-ahte chuan a zin thei a, mahse naupangte rilṭama leh hrehawm taka an awmna hmun, thingtlang hmunte chu a tlawh duh lo ang," tiin Rahul chuan Chhattisgarh Dabhra khuaa rally a neihah a sawi.