UDF aṭangin Kerala Congress bang

Kerala-a Congress party kaihhruai United Democratic Front (UDF) ṭangrual pawl aṭang≠in Kerala Congress a bang a, kum sawmthum chhung zet an lo thawhho tawhna a titawp.

Eptu ṭangrual pawl, UDF hnuaia Congress party thawhpui zingah Kerala Congress hi party lian pathumna niin, MLA paruk a nei mek a ni.

Party hotu leh finance minister hlui, KM Mani chuan kumin May 16-a assembly inthlanah, UDF an chet ṭhat tawk loh chungchangah Congress hruai ṭhenkhat chuan an party chu a mawhpuh niin a sawi a, hei vang hian Pathianni-a Charalkunnu, Pathanamthitta district-a party camp an neihah thutlukna hi an siam ta tih a sawi.

KM Mani chuan Congress hruaitu
ṭhenkhat chuan bial tam takah an party candidate-te chak lohna turin an bei a ni, a ti. "Special squad an ruai a, kan party nominee te chak lohna turin sum pawh tam tak an seng a ni" a ti. UDF hnuaia an thawhhona chu inrintawnna te, induh tawn leh inṭanpui tawnnaa innghat a ni a, hei hi an thawhpuite chuan an zawm theih loh avangin an awm zui zelna chhan tur a hriat loh thu a sawi. "Kum sawmthum zet UDF-ah hian kan tel tawh a, tunah chuan kan awmdan tur ngaihtuah ṭhat a hun tawh a ni" a ti.

Congress leh a thawhpui dang party-te chuan Kerala Congress party chhuanlam siam chu an pawm loh thu an sawi. Chief Minister hlui Oommen Chandy chuan an party candidate-te sum hman tur pawh an ngah tawk loh laia party dang candidate tihchhiatna tura sum thehchhuaka puhna chu thil awm lo tak niin a sawi.

Kerala Pradesh Congress Committee (KPCC) vice-president VD Satheeshan chuan rorellai, Left Democratic Front (LDF) sorkarin Mani-a inhnamhnawih telna, bar hnena thamna pek thubuai ngaihtuah thar leh a tum avangin Kerala Congress party hian he thutlukna hi an siam nia a rin thu a sawi. "Mani chuan UDF aṭanga a inlakhran chuan LDF sorkar hian a thubuaiah hian thiam a chantir theih a ring a ni" a ti.