Bawng humhalhtuten thupha chawi turin PM Modi-a an phut

Punjab state-a Bawng humhalhtu pawl, Gau Raksha Dal hotu Satish Kumar chuan Prime Minister Narendra Modi chu Hindu-te hnenah thupha chawi turin a phut a, thupha a chawi loh chuan Hindu pathiante anchhia chu a chungah an thlentir dawn niin a sawi.

PM hian kar kalta Inrinni-a thu a sawiah, Bawng humhalhtu pawl hming chhala midangte bei ṭhin chu khaw≠tlang dodaltu pawl an ni tiin, he pawl zinga 70-80% chu dik lo taka thiltihnaa inhnamhnawihte an ni, a ti. Hei hi Punjab-a bawng humhalhtu pawl chuan an haw hle a, PM hi a thusawi avang hian thupha chawi turin an phut.

Kumar leh a hote hian July 24 khan Bawng zuartute chu kut thlakin silaia vauin an motor an man sak a, pawisa an pek hnuah an chhuahtir chauh a ni. He thil thleng vang hian police station-ah FIR ziahluh a ni a, FIR-ah hian Kumar-a pawlte hnenah hian Rs 30,000 an pek hnuah motor hi a tlanchhuah an phalsak chauh niin an tarlang. Hei bakah hian bawng zuartute chu Kumar leh a pawlte hian a zunkhum a, hei hi video-a lain Facebook-ahte an thehdarh nia sawi a ni.

Kumar chuan a mite nen chuan Bawng humhalh turin an bei chhunzawm zel dawn a, Bawng zuartute pawh an beih let zel tur thu a sawi.

Pathianni tlai khan Karnataka state-ah pawh Bawng humhalhtu inti, Hindu mi ten Bawng zawrh tur phurtu, truck driver kut an thlak. Pawikhawihna thlenna hmun hi Uttara Kannada district-a Kumta khaw bulah a ni a, Hindu Jagaran Vedike activist-te chuan Bawng phurtu truck chu lo tidingin, a driver Nagabhushan Hegde chu kut an thlak zui a ni. Kut an thlak nat hmain police-te an thleng hman a, mahse activist-ten complaint an thehluh bawhzuiin police-te chuan driver hi an man zui a ni.

Social activist-te chuan police-ten Hindu Jagaran Vedike lam thu chauh laa truck driver an man chu an lungawi loh thu sawiin, thil thleng chu chhuichian an phut thu an sawi.