Zakir Naik-a foundation khap a ni mai thei

Law Ministry chuan firfiaka chetna fak leh pawikhawihna thleng tura midangte fuihphurtu nia puh, Islamic preacher, Zakir Naik-a foundation 'Islamic Research Foundation (IRF)' chu khapsak a ni mai thei nin a sawi.

Sorkar laipui chuan Naik-a laka FIR thehluh a la khawm mek a, heng zingah hian kum 2005 leh 2012-a mite pawh a tel. Thutlukna siam hmain heng FIR-te hi law ministry chuan a zirchiang dawn a ni.

Law Ministry chuan kum 1991-a Naik-a'n Mumbai-a a din, IRF chu Unlawful Activities (Prevention) Act (UAPA) hnuaiah dan kalha din niin a puang mai thei tih a sawi. UAPA hnuaiah IRF hi khap a nih chuan foundation member-ah hian tumah an awm thei dawn lo a, kum nga chhung khapna dan hi hman theih a ni ang. Hetihlai hian Naik hi police man pumpelh nan west Asia-ah a zinbo mek nia sawi a ni.

July 1-a Bangladesh, Dhaka cafe-a pawikhawihna rapthlak tak thlentu firfiak chu, Naik-a'n a channel Peace TV-a a thusawi a ngaihthlak aṭanga he thil hi thlen nia puh a ni. Hei vang hian Bangladesh chuan Peace TV tihchhuah hi a lo khap tawh a ni. Hei bakah hian Naik-a thusawi an ngaihthlak aṭangin Kerala-a mi 20 chu an chin hriat lohin an awm a, Islamic State (IS) zawm turin an kal nia rin an ni bawk.

Naik-a media adviser Aarif Malik chuan sorkar emaw, agency emawin Naik-a hnenah hian hriattirna engmah an la pe lo tih a sawi. Ram pawn lamah hna a ngah avangin kumin chhungin Naik hi India ramah a kir hman dawn lo a, mahse thil chhui chian≠naah sorkar chu a theih anga thawhpui zel a tum a ni, a ti. Naik chu sakhaw hrang hrangte inkara inpawhna ṭha a awm theih nana beitu zawk a ni, a ti.

Zakir Nail-a advocate Mubil Sokar pawhin IRF khapsak ngawt chu thil dik a ni lo tih a sawi a, "Dr Naik hi firfiaka chetna tihluar zawng leh, hetiang thil thlen tura midangte fuiha puhna hi a finfiahna a awm lo a, pawikhawihnaah a inhnamhnawih tih fiahna pawh a awm lo a ni. Hei vang hian a lakah UAPA hi hman ngawt theihna dan a awm lo" tiin a sawi.