Kashmir buainaah security mi 3,000 chuang an hliam

Police-te chuan July 8-a security force-ten Hizbul Mujahideen commander Burhan Wani an kahhlum avanga Kashmir Valley-a buaina chhuakah security mi leh sa 3,000 chuangin hliam an tuar tawh niin an sawi. Buaina hi ṭum 1,000 chuang zet a chhuak niin an sawi bawk.

Srinagar Police thupuangtu chuan, "July thla aṭang khan Jammu and Kashmir Police leh Central Paralimitary Force mi 3,329-te chuan dan kengkawh tura an beihnaah hliam an tuar tawh a ni" a ti.

Sipai hliam tuar zingah hian pahnih chu an hliam tuar loin an thi tawh a, mi dang eng emaw zat ruh tliakte pawh an awm a ni. Police-te hian thubuai 1,030 an ziak lut tawh bawk.

Tualchhung buaina chhuah hnu hian mipui thinrim chuan police station, police post leh sorkar hmun paiwmawh dang 29 an hal a, hmun 51 a mi an tichhe bawk. Buaina chhuak kaihhnawihah hian mi 1,000 chuang man an ni bawk a ni.

Security force leh mipuite inkara buaina chhuak vang hian mi 52 an thi tawh a, mi 5,000 chuangin hliam an tuar. Civil mi 200 chuang chuan security force-ten silaimu lem an kahchhuah avangin an mit-ah hliam an tuar a, ṭhenkhat chu mit del mai hlauhthawnawmin an awm.