Taliban-in regional partner pawimawh tiin India a sawi

Afghanistan-a Taliban foreign office chuan Indian foreign ministry official nena an inkawm hnuah, India chu "regional leh economic partner pawimawh tak" tiin a sawi.

Foreign Secretary Vikram Misri chuan Nilaini (January 8, 2025) khan Dubai-ah Taliban Foreign Minister hna thawk mek Amir Khan Muttaqi chu a kawm. Hei hi kum 2021-a Taliban-ten Afghanistan-a thuneihna an chan hnuah India nena high official meeting an neihna hmasa ber a ni. He meeting-ah hian ram pahnihte inlaichinna tih zauh dan tur te, Iran-a Chabahar Port kaltlanga insumdawn tawnna tihpun dan turte an sawi. India leh Afghanistan hian ramri inṭawm nei mah se, kum 1947 aṭang khan Pakistan occupied Kashmir-ah dan chah a ni.

Meeting zawhah Afghanistan foreign ministry thuchhuah chuan, India nena political leh economic lama inzawmna tih chak an tum thu leh, an thawhpui pawimawh tak a nih thu a tarlang a ni. India pawhin Afghanistan-a hmasawna project hrang hrang kalpui chungchang ngaihtuah a nih thuleh, sumdawnna lama inlaichinna tih chak a tum thu a tarlang ve bawk.

Afghanistan-a Taliban sorkar hi India pawh telin ram dang sorkar tumahin official-in an la pawm lo. Mahse India hian sumdawnna, ṭanpuina leh damdawi lam puihna turin mission a kalpui a, mipuite chhawmdawlna tur pawh a thawn bawk. Hei vang hian Afghanistan lam pawhin lawmthu an hrilh a ni. China leh Russia pawhin Afghanistan-a sumdawnna leh investment tih pun an duh thu an lo sawi ve tawh bawk a ni.