Global workforce ṭha siam turin pemchhuakte an pawimawh - Jaishankar

External affairs minister S Jaishankar chuan Thawhlehni,January 9, 2025 khan India-in global workforce ṭha a siamna turah ram danga pem chhuak, diaspora te an pawimawh thu a sawi.

Bhubaneswar-a Pravasi Bharatiya Divas convention-ah Indian diaspora-te hnena thu a sawinaah, Jaishankar chuan ram pawna harsatna an tawh hunah Narendra Modi kaihhruai sorkarin an thlavang a hauh zel dawn tih ring ngam turin a chah bawk.

"Kan Indian diaspora-te hlawhtlinna hi kan chhuang hle a ni," tiin, "Globalized era-ah hian kum tin diaspora(ramdanga pem) hi an pawimawh zual zel a, technology, tourism leh, trade emaw investment emaw pawh nise, khawvel pum huapa hnathawktu din kan tumna kawngah hian two-way flow hi a pawimawh hle," Jaishankar chuan a ti.

Minister chuan diaspora-te chanvo chu a ropui hle tih sawiin, India leh an chenna ramte inkar leidawh anga an tan avangin an chanvo chu a pawimawh a, Modi sorkarin mipui lam hawia a tihhmasawn mekte hian diaspora-te tan pawh hlawkna a thlen a ni, tiin a sawi.

"Hei hian sumdawnna awlsamna a tipung thei a, khawsak awlsamna a tipung thei a, inbiakpawhna leh zin chhuahna a ti awlsam thei bawk. Diaspora hamṭhatna tur atana digital technology hman dan pawh a lang chiang hle a ni," a ti.

"Kum sawm kalta chhung khan passport chungchang leh renewal tih awlsamna bakah attestation awlsam zawk kan hmu. Consular service tihchangtlun a ni a, welfare measures tihpun a ni a, grievance platform pawh a hlawhtling hle" tiin harsatna hunah chuan Modi sorkar hian an hnung a dawl zel dawn tih ring turin a chah.