Tirupati temple-a inpawngnekna thlengah mi 6 an thi

Andhra Pradesh-a Tirupati temple-ah Nilaini khan token sem laiin mipui pungkhawmte innek buaiin mi paruk an thi a, hliam tuar 40 chuang an awm.

Police-te chuan vanduaina hi Tirumala Hills-a Lord Venkateswara Swamy temple-a Vaikunta Dwar Srishanam neih tur atana ticket an semna hmuna thleng a nih thu an sawi.

Andhra Pradesh chief miniter Chandrabaibu Naidu chuan inpawngnekna thleng leh, hemia vanga thi leh hliam eng emaw zat an awm chu pawi a tih thu a sawi. DGP, TTD EO, District Collector leh SP-te nen thil thlen dan an thlirho thu a sawi. Nimin zing khan hliam tuar, damdawi-ina awmte chu CM hian a tlawh a, official-te hnenah damlote chu ṭha tak a enkawl an nih theihna tura hma la turin a hrilh nghal bawk.

Vikunta Dwara Dashanam hi naktuk aṭangin ni 10 chhung neih tur a ni a, he huna tel tum hian ram chhung hmun hrang hrang aṭangin an kalkhawm a ni. CM chuan a buaipuitute chu mi tam tak an pungkhawm dawn tih hre chunga ruahmanan fel fai tak an siam loh chhan te a zawt a ni.

State sorkar chuan temple-a inpawngnekna thlenga thi chhungte hnenah zangnadawmna Rs nuai 25 ṭheuh pek an nih tur thu a puang. Innekbuaina hi token counter hrang hrangah a thleng a, counter hi ni thum chhung, January 10-12 zing dar 5 aṭanga hawn tura tih ni mah se, mi tam tak an lo intlar lawk a ni. Vanduaina a thlen hnu hian counter hi hawn belh tura tih an ni tawh bawk.

Prime minister Narendra Modi chuan inpawngnekna thleng vanga thi an awm chu pawi a tih leh a tuarpui thu a sawi a, hliam tuarte chu an dam ṭhat thuai a beisei thu a sawi. President Droupadi Murmu pawhin vanduaina thlenga thi chhungte a tawrhpui thu a sawi.