Jail-a TB umbo nan ni 100 chhung campaign buatsaih turin ngen

Union Ministry of Home Affairs (MHA) chuan sorkar laipuiin tuberculosis(TB) umbo tuma hma a lakna kal zelah, state leh union territory zawng zawng hnenah jail leh correctional institution-ahte he nanta hri umbo a nih theihna ni 100 chhung campaign buatsaih turin a ngen.

He hmalakna hi jail chhunga TB vei darh zel tur tha taka thunun leh tihtlem nan a pawimawh hle. December 7, 2024 khan Union Health Minister J.P. Nadda chuan Haryana-ah ram pum huapa ‘ni 100 chhunga TB tihbo campaign’ chak zawka kalpui tum a nih thu hi a lo sawi tawh bawk.

Ram puma district 347-a kalpui tur he campaign hian a tum ber chu TB vei, a bik takin high-risk group-a awmte zawn chhuah leh enkawl a, TB vanga thihna thlengte nasa taka tih tlem a ni. Mobile, ultra-portable, AI (artificial intelligence) hmanga siam X-ray unit leh molecular test hmanga in enkawlna changkang zawk te mipui hman tangkai zawk theih tura kalpui a ni a, a bik takin hmun hla taka awm te tana awlsam zawk tura tih a ni bawk.