Parliament monsoon session nei ṭan

Parliament monsoon session chu nimin aṭang khan neih ṭan a ni a, ni 18 chhungin ṭhut khawm vawi 18 neih tum a nih bakah item 47 ngaihtuah tum a nih thu Ministry of Parliamentary Affairs chuan a tarlang.

Parliamentarian leh staff-te zawng zawng chu an hriselna dinhmun en hmasak vek phawt an ni. Nimin session hi kumin kumtir lama Covid-19 hri len hnua session neih leh hmasak ber a ni. 

Session neih chhung hian hri laka invenna khauh taka kenkawh zel a ni dawn a, member-te chu chhun chawlhah packed food pek vek an ni ṭhin ang. Pathianni khan Lok Sabha speaker Om Birla hnena Covid-19 kit sem a ni a, hemi hnu hian DRDO (Defence Research and Development Organisation) chuan Covid-19 laka MP zawng zawngte an fihlim theih nan Covid-19 kit chu MP-te hnenah an sem ve bawk.

Kit pakhatah hian disposable mask 40, N-95 mask panga, sanitiser (50 ml) bottle 20, face shield, glove pair 40, kuta kawngka hawn leh khar ngai lo turin  touch-free hook a tel bawk a, herbal sanitation wipe,  immune tihchakna tur tea bag-te chu a tel. Hei bakah hian kit an pek ah hian Covid safety manual chhiar tur pawh dah a ni.

Parliament session ṭan hmaa all-party meeting neih hmasak ṭhin chu Covid-19 hri leng vangin neih a ni lo. 

Nimin aṭanga neih ṭan parlia­ment inkhawm hi 17th Lok Sabha session vawi 4-na a ni a, Rajya Sabha tan erawh session 252-na a ni thung. Ni khatah dar kar li chhung session neih ṭhin a ni ang a; zing dar kua aṭangin tlai dar khat, tlai dar 3 aṭanga zan dar 7 thleng neih ṭhin a ni ang. 

Session-ah hian Congress president atan ruat lailawk Sonia Gandhi chu nimin khan a tel thei lo a, ram danga a hriselna dinhmun entir a ngaih avangin session-ah hian a inlan lo. Sonia bakah hian a fapa Rahul Gandhi chuan a nu hi a zui ve a, hei vang hian ani pawh session-ah hian a inlan lo bawk.